दोरम्बा शैलुङ पहिरो अपडेट : ६ वटा शव भेटियो, ४ जना बेपत्ता

भाद्र ९, काठमाण्डौँ ।  रामेछापको दोरम्बा शैलुङ ३ लेखर्कवस्तीमा गएको पहिरोमा ६ जनाको मृत्यु भएको छ । मृत्यु हुनेमा चण्डिका थापामगर र उनका २ वर्षका छोरा आयुस रहेका छन् । थापामगर शिक्षिका हुन् । मृतक अन्य ४ जनाको पहिचान खुल्न सकेको छैन ।

यस्तै पुड्की पहरी, उर्मिला पहरी, सन्तोष पहरी, विज्ञान पहरी, सन्दीप पहरी, काले पहरी झ्याउकिरी पहरी र विपिता पहरी पनि पहिरोमा परेका छन् ।

भेटिएका थप ४ वटा शव उनीहरुमध्येकै हुनसक्ने अनुमान प्रहरीको छ ।

गए राति गएको पहिरोमा परी ४ जना अझै बेपत्ता छन् । १ जनाको सकुशल उद्धार गरिएको छ ।

यस्तै अञ्जना पहरीको उद्धार गरिएको छ । उनी खतरामुक्त रहेको प्रहरीले जनाएको छ ।

पहिरोले ४ वटा घर बगाएको थियो । यस्तै एउटा पक्की पुल पनि बगाएको छ ।