सुदूरपश्चिममा थप चार जनामा कोरोना सङ्क्रमण पुष्टि

जेठ २४, काठमाडौं । सुदूरपश्चिम प्रदेशमा पछिल्लो २४ घण्टामा थप चार जनामा कोरोना सङ्क्रमण पुष्टि भएको छ । सङ्क्रमण पुष्टि हुने सबै भारतबाट आएका पुरूष छन् ।

सुदूरपश्चिम प्रदेश स्वास्थ्य निर्देशनालय, महामारी सम्पर्क व्यक्ति हेमराज जोशीका अनुसार त्रिनगर नाकामा तीन जना र एक जनाको झुलाघाट नाकामा एन्टिजेन परीक्षण गर्दा सङ्क्रमण पुष्टि भएको हो । सङ्क्रमितहरु कञ्चनपुर, अछाम र बझाङका रहेको जोशीले जानकारी दिए ।

सङ्क्रमितहरुलाई ‘होम आइसोलेसन’ बस्न भनिएको छ । यसअघि हिजो पाँच जनमा कोरोना सङ्क्रमण देखिएको थियो । योसँगै सुदूरपश्चिम प्रदेशमा कोरोना सङ्क्रमण पुष्टि हुनेको संख्या १३ पुगेको छ ।

स्वास्थ्य तथा जनसङ्ख्या मन्त्रालय स्वास्थ्य सेवा विभागले सङ्क्रमणको महामारी निम्तन सक्ने साम्भव्यतालाई मध्यनजर गर्दै मातहातका कार्यालय, अस्पताल र प्रयोगशाला तयारी अवस्थामा रहन निर्देशन दिएको छ ।