नेपाल विश्व स्वास्थ्य संगठनको कार्यकारी समिति सदस्यमा निर्वाचित

जेठ ९, काठमाडौं । नेपाल विश्व स्वास्थ्य संगठन (डब्ल्यूएचओ) को कार्यकारी समितिको सदस्यमा सर्वसम्मत निर्वाचित भएको छ । स्वीजरल्याण्डको जेनेभामा जारी विश्व स्वास्थ्य संगठनको ७८औँ सम्मेलनबाट नेपाल कार्यकारी समितिको सदस्यमा निर्वाचित भएको हो ।

सम्मेलनमा भाग लिन जेनेभा पुगेका स्वास्थ्य तथा जनसंख्यामन्त्री प्रदीप पौडेलले सामाजिक सञ्जालमार्फत उक्त जानकारी गराएका हुन् । यसले नेपालका स्वास्थ्य सुधारका असल प्रयासको विश्वव्यापी प्रसार अनि विश्वका राम्रा अभ्यासको अनुकरणका लागि अझ ठूलो सम्भावनाको ढोका उघारेको बताए ।

यसअघि नै मन्त्री पौडेलले रोजगारदाता देशहरुले नै श्रमिकहरूको स्वास्थ्योपचारको जिम्मेवारी लिनुपर्ने प्रस्ताव समेत डब्ल्यूएचओमा राखेका छन् ।