राजस्व छल्न भारतीय नागरिक केशव वंसलले राखे नेपालीको नाममा करोडौं सम्पत्ति

कार्तिक २८, काठमाडौं ।नेपालमा सर्जिकलका सामग्रीको व्यापार गर्दै आएका काठमाडौँ बाफल बस्ने भारतीय नागरिक केशव वंसलले राजस्व छलेर नेपालीको नाममा सम्पत्ति राखेको प्रारम्भिक अनुसन्धानमा देखिएको छ । राजस्व चुहावट (अनुसन्धान तथा नियन्त्रण) ऐन, २०५२ बमोजिम कसुर गरी मूल्य अभिवृद्धि करतर्फ ३ करोड १२ लाख रुपैयाँ तथा आयकरतर्फ ८ करोड सात लाख रुपैयाँ गरी कुल ११ करोड १९ लाख ८४ हजार रुपैयाँ बिगो बराबरको राजस्व छली गरेको विभागका महानिर्देशक दीर्घराज मैनालीले जानकारी दिए ।

वंसलले काठमाडौँमा सञ्चालन गरेको हस्पी केयर इन्टरनेसनल र श्रीश्याम ट्रेडर्सले वस्तु तथा सेवा खरिद नै नगरी झुठो तथा नक्कली मूल्य अभिवृद्धि करको बिजक मात्र खरीद गरी मूल्य अभिवृद्धि कर र आयकर छली गरेको उक्त अनुसन्धानमा देखिएको हो । छली गरेको रकमबाट उनले नेपालीको नाममा विभिन्न भौतिक सम्पत्ति जोडेको फेला परेको छ ।

उक्त घटनामा सहयोगी बनेका दुवै कम्पनीका सञ्चालक रामसुन्दर राय र राकेश पाण्डेयसहित ११ जनाविरुद्ध काठमाडौँ जिल्ला अदालतमा यही कात्तिक २५ गते मुद्दा दर्ता गरिएको छ । अन्य आठ जना नेपाली उनको सम्पत्ति आफ्नो नाममा राखिदिएकाले मतियारका रूपमा मुछिएका हुन् ।

‘वंसलले ११ करोड १९ लाख ८४ हजार १६४ रुपैयाँ बिगो बराबरको आर्थिक अपराध गरेको भेटियो, बिगो असुलउपर गरी दोब्बर जरिवाना र तीन वर्ष कैदको माग गर्दै मुद्दा चलाएका छौँ,’ महानिर्देशक मैनालीले भने । उनले दुई वटा गाडी, एउटा घर तथा सर्जिकल सामग्री बिक्री गर्ने फार्म नेपालीको नाममा राखेर राजस्व छली गरेका हुन् । उनले यस्तो घटना विभागका लागि पहिलो भएको बताए ।

‘आर्थिक अपराधविरुद्ध विभागले सूक्ष्म निगरानी गरिरहेको छ, यो घटना त्यसैको उपलब्धि हो, यस्ता झन्डै ६० वटा फार्म अहिले पनि अनुसन्धानको दायरामा छन्,’ मैनालीले थपे । वंसलले सम्पत्ति शुद्धीकरणसम्बन्धी कसुरसमेत गरेको देखिएकाले विभागले अनुसन्धान गर्न सम्पत्ति शुद्धीकरण अनुसन्धान विभागलाई पत्राचार गरिएको छ ।

विभागले झुठो बिल जारी गरी ११ अर्बभन्दा बढी बिगो बराबरको राजस्व चुहावट गरी आर्थिक अपराध गरेको आरोप लागेका ४३१ व्यक्तिविरुद्ध मुद्दा चलाएको छ । उनीहरूमध्ये आठ जना भन्सार कर्मचारीसमेत छन् ।

राजस्व अनुसन्धान विभागले उनीहरूमाथि बिगो असुल गरी दोब्बर जरिवाना र तीन वर्ष कैदको माग दाबीसहित विभिन्न मुद्दा चलाएको छ । वंसल जस्ता केही विदेशी नागरिक पनि राजस्व चुहावट र विदेशी विनिमय अपचलनमा मुछिएका छन् ।

यसरी पत्ता लाग्यो राजस्व छली

आठ वर्षअघि सर्जिकल सामानको व्यापारका लागि वंसल नेपाल छिरेका थिए । उनले गोरखा वेलफेयरमार्फत इसिजी पेपरको बिक्री व्यवसाय पनि गर्थे । उनले आपूर्ति बढी मूल्यमा गर्ने तर नक्कली बिलबाट न्यून खरिद (कम सामान आपूर्ति गरेको) देखाएर हिसाब मिलान गरी राजस्व छली गर्दै आएका थिए । आठ वर्षअघि व्यवसाय थाले पनि विभागले उनीविरुद्ध भने २०७५ साल माघदेखि मात्रै अनुसन्धान थालेको थियो ।

सुरुमा विभागले हस्पी केयर इन्टरनेसनललगायत फमका आर्थिक गतिविधि शंकास्पद लागेर अनुसन्धान थालेको थियो । अनुसन्धानका क्रममा हस्पी केयरसँगै श्याम ट्रेडर्स पनि झुठो बिलबिजक बनाएर कर छलीमा तानियो । दुवै कम्पनी वंसलकै लगानीमा नेपालीको नाममा दर्ता गरेको भेटियो । गतिविधि थप शंकास्पद देखियो । झन्डै चार महिनाअघि अनुसन्धान नसकिँदै आफू पक्राउ पर्ने देखेपछि उनी नेपालबाट भाग्न सफल भएको विभागले जनाएको छ । ‘जब हामीले उनको घर पत्ता लगाएर छापा मार्न गयौँ, उनी केही घण्टाअघि नै निस्किएका रहेछन्,’ विभागका एक अनुसन्धान अधिकृतले भने ।

साथीकी श्रीमतीको नाममा घर

अनुसन्धानमा वंसलले सर्जिकल सामानको कारोबार गर्ने नेपाली साथीकी श्रीमतीको नाममा कोहिनुर हिल हाउजिङमा घर किनेको पत्ता लाग्यो । त्यसैगरी दुई वटा गाडी पनि नेपालीकै नाममा किनेर प्रयोग गर्दै आएका थिए तर गाडी पत्ता लगाउन विभागलाई ठूलो सकस भयो । खोज्दै जाँदा गाडी वर्ल्ड ट्रेड सेन्टरभित्र लुकाएर राखेको अवस्थामा फेला परेको थियो ।

विभागले अहिले दुई गाडी, एउटा घर नेपालीको नाममा किनिएको फेला पारेको छ । उनका तीन वटा सर्जिकल गोदाम सिल गरिएको छ । केही सामान स्थानान्तरण गरेको फेला परेको छ । वंसल फरार रहेकाले विभागले अहिले ४ करोड ८८ लाख रुपैयाँको सामान लिलाम बिक्री गरी विभागको धरौटी खातामा जम्मा गरेको छ । केही ठाउँबाट आउने ४० लाख रुपैयाँ भुक्तानीसमेत रोक्का गरिएको छ ।

उनले नक्कली नेपाली नागरिकतासमेत बनाएको भेटिएको विभागले जनाएको छ । विभागले यस्ता ६० भन्दा बढी फार्मको अनुसन्धान गरिरहेको जनाएको छ । (रासस)