टी २० विश्वकप

अदालतबाट सफाइ पाएसँगै सन्दिपले विश्वकप खेल्ने सम्भावना कति ?

सबै प्रक्रिया सक्न ३–४ दिन लाग्न सक्छ
  • अनलाइन केन्द्र
  • / खेलकुद /
  • २०८१ जेष्ठ ३, बिहिबार (११ महिना अघि)
  • १५२ पटक पढिएको
अदालतबाट सफाइ पाएसँगै सन्दिपले विश्वकप खेल्ने सम्भावना कति ?

जेठ ३,काठमाडौँ । क्रिकेटर सन्दीप लामिछानेले उच्च अदालतबाट सफाइ पाएसँगै नेपाल क्रिकेट संघ (क्यान) ले उनलाई टी २० विश्वकपमा लैजान पहल सुरु गरेको छ । अन्तर्राष्ट्रिय क्रिकेट परिषद् (आईसीसी) सँग एक जना खेलाडी प्रतिस्थापनका लागि अनुमति माग्दै पत्राचार गरिएको क्यान स्रोतले बतायो ।

आईसीसीले दिएको डेडलाइनमा नेपालले १५ सदस्यीय टीम घोषणा गरिसकेको छ । सो टीम अमेरिका प्रस्थान गरेर अहिले अभ्यास म्याचहरू खेलिरहेको छ । सन्दीप भने जिल्ला अदालतबाट दोषी ठहर भएपश्चात् क्यानको निलम्बनमा थिए । समयमै फैसला आएपछि उनी पनि विश्वकपमा सहभागी हुन सक्ने बाटो खुलेको हो ।

क्यानले सन्दीपलाई विश्वकपमा सहभागी गराउनका लागि आईसीसीबाट अनुमति लिनुपर्ने हुन्छ । विश्वकप खेल्ने कुनै पनि टिमले २५ मे सम्म आफ्नो टिममा फेरबदल गर्न पाउँछन् । त्यसैले प्राविधिक कठिनाइ छैन । सन्दीपको मुद्दा फैसला प्रक्रियामा जानासाथै क्यानले उनलाई विश्वकपमा खेलाउनका लागि आफ्नो तयारी गरिरहेको थियो ।

स्रोतले भन्यो, ‘उनले सफाइ पाउने आशामा हामीले अगाडि नै आईसीसीसँग संवाद गरिरहेका थियौँ । अब आईसीसीले अनुमति दिनासाथ उनलाई विश्वकपमा पठाउनेछौँ । सबै प्रक्रिया सक्न ३–४ दिन लाग्न सक्छ ।’

२५ तारिखभित्र उचित कारण देखाएर १५ सदस्यीय स्क्वाडमा रहेका खेलाडी प्रतिस्थापन गर्न सकिने आईसीसीको नियम छ । त्यसो त विश्वकप सुरु भइसकेपछि पनि कुनै पनि समय खेलाडी प्रतिस्थापन गर्न सकिन्छ । स्वाक्डभित्र कोही खेलाडी घाइते भएको वा अन्य कारणले खेल्न नसक्ने भएमा आईसीसीले प्रतिस्थापन गर्ने अनुमति दिन्छ ।

स्रोतका अनुसार अमेरिका पठाउनुअघि सन्दीपको फिटनेस परीक्षण गरिने छ । क्यानका स्ट्रेन्थ एन्ड कन्डिसन एक्स्पर्ट अब्जुल सतार अमेरिकामा छन् । उनले पठाएका गाइडलाइन अनुसार सन्दीपको फिटनेस हेरिने स्रोत बताउँछ ।

ताजा अपडेट

खोजी गर्नुहोस