भूमि फिर्ता लिइछाड्ने साझा संकल्प संसदबाटै गर्ने प्रस्ताव गरौँ : नेता थापा

जेठ १०, काठमाडौ । नेपाली कांग्रेसका नेता गगन थापाले संविधान संशोधनसँगै भारतले अतिक्रमण गरेको भूमि फिर्ता लिइछाड्ने साझा संकल्प संसदबाटै गर्ने प्रस्ताव अघि सारेका छन् । सरकारले ५ जेठमा लिम्पियाधुरा, कालापानी र लिपुलेकलाई समेटेर नेपालको नयाँ राजनीतिक तथा प्रशासनिक नक्सा पारित गरेको थियो । त्यसअनुसार निशान छाप सच्याउन संविधानको अनुसूची तीन संशोधन गर्ने विधेयक संसदमा दर्ता भएको छ ।

कांग्रेस संसद थापाले राष्ट्रिय प्रतिवद्धताको विषय भएकाले संविधान संशोधन प्रस्ताव द्रतुगतिमा सर्वसम्मत पास गर्नुपर्ने बताएका छन् । नेपालको नयाँ नक्सा संविधानको अंग भएसँगै राष्ट्रिय स्वाभिमानको लडाईमा महत्वपूर्ण अध्याय सुरु हुने उनले बताए ।

‘यस उप्रान्तको काम कूटनीतिक रुपमा अझै जिम्मेवारीपूर्वक गर्नुपर्नेछ । यतिखेर भारतले नेपाली भुभामा उपस्थितिसँगै नियन्त्रण राखेको छ’ उनले भनेका छन्, ‘अबको बाटो भनेको हामीले हाम्रो भूभागबाट भारतीय उपस्थिति तथा नियन्त्रणको अन्त्य गरी आफ्नो प्रभावकारी नियन्त्रण कायम गर्ने ।’