हेटौँडामा लैङ्गिक हिंसाविरुद्व कार्यक्रम सम्पन्न

मंसिर २५, हेटौंडा ।  लैङ्गिक हिंसाविरुद्व १६ दिने अभियानअन्तर्गत आज लैङ्गिक हिंसा, कारण र समाधानका उपायबारे अन्तरक्रिया कार्यक्रम सम्पन्न भएको छ ।

‘लैङ्गिक हिंसा र दुव्र्यवहार, छैन हामीलाई स्वीकार’ भन्ने नाराका साथ सञ्चालित कार्यक्रममा सहभागी महिला वक्ताले महिला सशक्तीकरणका साथै महिलामाथि हुने हिंसा रोक्न सरकारी तथा गैरसरकारी पक्षबाट कडाइका साथ लाग्नुपर्नेमा जोड दिएका थिए ।

अखिल नेपाल महिला सङ्घ मकवानपुरका अध्यक्ष पार्वती रानाले महिलालाई शिक्षा, स्वास्थ्य र रोजगारीको वातावरण बनाउनुपर्ने बताउनुभयो । कार्यक्रममा ३ नं प्रदेशसभा सदस्य जुनेली श्रेष्ठले समाजमा महिलामाथि महिलाले नै भेदभाव एवं लैंगिक हिंसा गर्ने गरेकाले त्यसको न्यूनीकरणका लागि सबै महिला एक हुनुपर्ने जोड दिए ।

अखिल नेपाल महिला सङ्घद्वारा आयोजित उक्त कार्यक्रममा पूर्वनेकपा माओवादी जिल्ला सचिवालय सदस्य प्रमिला लामा, अखिल नेपाल महिला सङ्घ क्रान्तिकारीका केन्द्रीय सचिवालय सदस्य लक्ष्मी पाख्रिन, महिला सङ्घका विष्णु ओझालगायतले बोलेका थिए।