जनतालाई सुसुचित गर्न सामुदायिक रेडियोहरुको भूमिका महत्वपूर्ण : पूर्वप्रधानमन्त्री खनाल

फाल्गुण २, काठमाण्डौ । पूर्वप्रधानमन्त्री झलनाथ खनालले आफ्ना हक अधिकारका विषयमा जनतालाई सुसुचित गर्न सामुदायिक रेडियोहरुले महत्वपूर्ण भूमिका खेलेको बताएका छन् । नवौँ विश्व रेडियो दिवसको अवसरमा आयोजित कार्यक्रममा बोल्दै खनालले सूचनाको हक, समानताको हक, लोकतान्त्रिक हकको सन्र्दभमा व्यापक प्रचार प्रसार गरी जनतालाई सुसुचित बनाउन रेडियोले भूमिका खेलेको बताएका हुन् ।

प्रेस स्वतन्त्रताको सुनिश्चितताका लागि आफूले निर्वाह गर्नुपर्ने भूमिकाका लागि प्रतिवद्ध रहेको उल्लेख गर्दै नेपाल कम्युनिष्ट पार्टी नेकपाका वरिष्ठ नेता समेत रहेका खनालले राष्ट्रियताको सवालमा देशभक्तिको भावना विकास गर्न पनि सामूदायिक रेडियोको भूमिका महत्वपूर्ण हुने बताए ।

खनालले नेपालको संविधानले सम्पूर्ण नेपालका लागि आवयश्क हक अधिकार सुनिश्चित गरेको, देश, जनता, सभ्यता, संस्कृति, स्रोत साधनप्रति माया गर्न सिकाएको र परिवर्तनका सबै ढोकाहरु खोलेको उल्लेख गरे । विश्वमै उत्कृष्ट रहेको संविधान आफैंमा पूर्ण नभएपनि विकासमा डकुमेन्ट्री भएकाले यसलाई आवश्यकता अनुसार परिमार्जन र परिस्कृत गर्दै लैजानुपर्ने उनले बताए ।